Deputetë të opozitës kërkojnë që të ndryshohet amendamenti 2 i nenit 81 i Kushtetutës së Republikës së Kosovës, i cili i jep mundësi komunitetit serb t’i kushtëzojë institucionet e Kosovës në shumë çështje.
Pothuajse në secilën seancë plenare futet në rend dite projektligji për plotësim ndryshim për Liritë Fetare, i cili si i tillë nuk mund të miratohet pa 11 votat e deputetëve nga radhët e komunitetit serb.
E pikërisht mungesa e këtyre deputetëve e ka lënë peng mosmiratimin e këtij ligji, i cili për disa herë radhazi largohet prej rendit të ditës.
Lista serbe po ashtu po mban peng edhe miratimin e Ligjit për Arsimin e lartë si dhe atë për Trashëgiminë Kulturore.
Opozita thotë se nga kjo situatë, të cilën e ka krijuar me kushtëzime Lista Serbe, Kosova po humb shumë duke rrezikuar kështu edhe anëtarësimin në UNESCO.
E deputetja nga radhët e AAK-së Teuta Haxhiu shkon edhe më larg duke kërkuar nga Kuvendi ndryshimin e Kushtetutës, pikërisht amendamentin 2 në nenin 81 paragrafi 1, sipas të cilit, për miratimin e Ligjit për Liritë Fetare dhe disa ligjeve të tjera duhen 11 vota të komuniteteve jo shumicë.
Ndërkaq, sekretari i Kuvendit të Kosovës, Ismet Krasniqi, i pyetur se pse sillet në çdo seancë projektligji për Liritë Fetare për miratim kur dihet që vendet e deputetëve të Listës Serbe janë boshe, ai është përgjigjur duke theksuar se nuk mund ta paragjykojnë a do të jenë apo jo deputetët në sallë.
